الأسعار

كيف تُسعَّر المشاريع

ما في قائمة أسعار على هذا الموقع، وهذا مقصود — برنامج حجوزات لقاعة وحدة وبرنامج لسلسلة من ست قاعات مش نفس المنتج، ولو سعّرتهم بنفس الطريقة رح أظلم واحد فيكم. اللي ما بتغيّر هو الطريقة: بيوصلك سعر ثابت ومكتوب قبل ما حدا يلتزم بإشي.

الثوابت

اللي بينطبق على كل مشروع

سعر ثابت، مكتوب، قبل ما يبدأ الشغل

بتشوف النطاق الكامل والرقم الكامل مع بعض. مش سعر بالساعة، ولا تقدير بيكبر مع الوقت.

أي تغيير بالنطاق بينسعّر لحاله

لو أضفت إشي بنص المشروع، بيوصلك سعر منفصل إله وإنت بتقرر. ما بينضاف إشي على فاتورتك بدون موافقتك.

دفعات مرتبطة بالتسليم

الدفع بينقسم على مراحل بتشوفها شغّالة فعلياً — مش على تواريخ بالتقويم.

التدريب والتسليم مشمولين

فريقك بينتدرب على النظام وبتستلم التوثيق. النظام اللي محدا بيعرف يشغّله مش مُسلَّم.

العوامل

شو اللي فعلاً بيحرّك السعر

لما بتحكيلي عن وضعك، هاي الخمس أشياء اللي بتنحسب. لما تعرفها بتقدر تفصّل المشروع على ميزانيتك بدل ما تكتشف الرقم بالآخر.

قدّيش بتحتاج من النظام فعلاً

أغلب الأنظمة مبنية على وحدات. تبدأ بالقسم الأكثر إلحاحاً وتفعّل الباقي لاحقاً أرخص دائماً تقريباً من بناء كل شي مرة وحدة — وبيوصلك نظام شغّال أسرع.

المستخدمين والفروع والصلاحيات

محل واحد بكاشيرين غير ست فروع بمخزون منفصل ومدراء ومستويات صلاحيات.

الربط مع اللي بتستخدمه أصلاً

بوابات الدفع، واتساب، برامج المحاسبة، الفوترة الإلكترونية، شركات الشحن، الأجهزة الموجودة. كل ربط شغل حقيقي، وكل ربط بتقدر تستغنى عنه مصاري موفّرة.

نقل بياناتك الحالية

بيانات نظيفة بملف إكسل سريعة. خمستعشر سنة سجلات على ثلاث أنظمة بأسماء غير موحّدة لأ. وهاي التكلفة اللي الناس بتنسى تحسب حسابها.

أي نموذج تسليم بتختار

الاشتراك بيوزّع التكلفة وبيشمل الاستضافة والتحديثات. النسخة الخاصة على خادمك بتكلّف أكثر بالبداية وأقل مع الوقت. النسخة بعلامتك التجارية بينهم.

نماذج التسليم

ثلاث طرق للامتلاك

نظام خاص

النظام بيشتغل على خادمك إنت. بتملكه وبياناتك ما بتطلع من بنيتك التحتية. تكلفة أولية أعلى، وبدون رسوم ترخيص متكررة.

بعلامتك التجارية

النظام بيحمل علامتك التجارية وبتبيعه لعملائك. بينسعّر حسب اللي ناوي تعمله فيه.

بصراحة

لو الميزانية هي العائق

احكيها من أول رسالة. مش إشي محرج — بالعكس، هي أنفع معلومة بتقدر تعطيني ياها، لأنها بتغيّر شو بنصحك فيه. مشروع مفصّل على ميزانية حقيقية ومسلَّم على مراحل أفضل من عرض مثالي بترفضه. ولو اللي بتحتاجه فعلاً بيكلّف أكثر من قيمته إلك، رح أقولك هيك كمان.

خُذ رقمك

احكيلي وين المشكلة بشغلك وبيوصلك خطة واضحة وسعر ثابت — بدون أي التزام، وبدون أي رسوم على الاستشارة.

اطلب عرض سعر أو اسأل على واتساب